బ్రైస్ కెన్యన్ నేషనల్ పార్క్ (Bryce Canyon National Park)

ఈ పోస్ట్ నేషనల్ పార్క్స్ ప్రయాణం లోని భాగం. ప్రయాణం మొదటి నుండి చదవాలనుకుంటే ఇక్కడకు, ఇంతకు ముందు భాగం చదవాలంటే ఇక్కడకు వెళ్ళండి.

యూటా(Utah)లోని మైటీ ఫైవ్ నేషనల్ పార్క్స్(Mighty Five National Parks) లో బ్రైస్ కెన్యన్ నేషనల్ పార్క్ (Bryce Canyon National Park) కూడా ఒకటి. 

జ్సయాన్ నేషనల్ పార్క్ నుండి బ్రైస్ కెన్యన్ నేషనల్ పార్క్ కు వెళ్ళడానికి దాదాపుగా రెండు గంటలు పట్టింది. ముందుగా విజిటర్ సెంటర్ దగ్గర స్టాంప్ వేసికుని అక్కడి నుండి పార్క్ దగ్గరకు వెళ్ళాము. పార్కింగ్ లాట్ నుండి నాలుగడుగులు వెయ్యగానే ఎత్తుగా పాండురోజా(Ponderosa Trees) చెట్లు. వాటి మధ్యగా నడుస్తూ వెళితే అంత దూరాన పెద్ద లోయ కనిపించింది. దగ్గరగా వెళ్ళి చూస్తే ఒక అద్భుతమే!

పాండురోజా చెట్లు సవ్వడి చేస్తూ చెట్లు గాలి పాట పాడుతున్నాయి. ఆ పాటను ఆస్వాదించడానికి పగడపు తొడుగు వేసుకుని వచ్చినట్లుగా ఉంది లోయ. 

బ్రైస్ కెన్యన్ లో సన్నగా పొడవుగా విగ్రహాలు నిలబడినట్లు ఉన్న ఆ రాళ్ళను ‘హుడూస్’ అంటారు. గాలి, నీరు, మంచు వలన రాళ్ళు అంత అందంగా తయారవుతాయా అని ఆశ్చర్యపోయాం. సమ్మోహనమైన ఆ లోయ అందాలు చూస్తూ క్వీన్స్/నవాహో కాంబినేషన్ లూప్ (Queen’s/Navajo Combination Loop) ట్రైయిల్ వెంబడి నడవడం ఎంతో బావుంది.

 

ఆ దారిమమ్మల్ని లోయ చుట్టూ తిప్పి కింద వరకూ తీసికెళ్ళిపోయింది. తిరిగి పైకి ఎక్కడానికి కొండల మధ్యగా కట్టిన మెట్లు ఎక్కాలి. ఆ కొండలు పెద్ద గోడలాగా ఉండడంతో ఆ ప్రాంతాన్ని వాల్ స్ట్రీట్ అంటారు. వాల్ స్ట్రీట్ దగ్గర మెట్లు ఎక్కడం మాత్రం కొద్దిగా కష్టమే అయింది. 

ఆ మెట్లన్నీ ఎక్కి సన్ సెట్ పాయింట్ దగ్గరకు వచ్చాక మాత్రం ఆ నడిచిన అలసట అంతా పోయింది.

చివరగా ‘ఇన్స్పిరేషన్ పాయింట్ (Inspiration Point)’ కు కూడా వెళ్ళి ఆ లోయ అందాలు మరోసారి చూసి అక్కడి నుండి క్యాపిటల్ రీఫ్ (Capitol Reef) కు బయలుదేరాము.

తరువాత భాగం చదవలనుకుంటే ఇక్కడకు వెళ్ళండి.