పెంథియాన్, కొలసియం

ఈ పోస్ట్ యూరప్ ప్రయాణం లో ఒక భాగం. ఇంతకు ముందుభాగం చదవాలంటే ఇక్కడకు  వెళ్ళండి. మొదటి నుండీ చదవాలంటే ఇక్కడకు వెళ్ళండి. 

వాటికన్ సిటీ నుండి పెంథియాన్(Pantheon) కు వెళ్ళడానికి బస్ ఎక్కాము. బస్ దిగి వెళుతూ ఉంటే దారిలో ఒక చిన్న పిజ్జా ప్లేస్ కనిపించింది. అక్కడ పిజ్జాలు గుండ్రంగా కాక దీర్ఘచతురస్రాకారంలో ఉన్నాయి. ఖరీదు కూడా తూకం ప్రకారం ఉంది. ఆ పిజ్జా ఎలా ఉంటుందో అనుకుంటూ వెళ్ళాము కానీ, చాలా బావుంది, చెప్పాలంటే అంతకు ముందు మేము రెస్టారెంట్ లో తీసుకున్న పిజ్జా కంటే బావుంది.

అక్కడికి నుండి కొద్ది దూరం వెళ్ళగానే కనిపించింది ఎత్తైన రాతి స్తంభాలతో నిర్మించిన పెంథియాన్. లోపలకు అడుగు పెట్టగానే ఒక పెద్ద గది, పైన ఎత్తుగా డోమ్, ఆ డోమ్ మధ్యలో ఉన్న రంధ్రం ద్వారా మద్యాహ్నం ఎండ లోపలకు పడుతూ ఆ ప్రాంతాన్ని గొప్ప వెలుగుతో నింపుతోంది.

  

పెంథియాన్ అంటే గ్రీకు భాషలో గుడి అని అర్థం. రెండవ శతాబ్దంలో ఇప్పుడు పెంథియాన్ ఉన్న ప్రాంతంలో గుడి ఉండేది, ఆ గుడిలో గ్రీకు దేవుళ్ళ విగ్రహాలు ఉండేవి. ఆ తరువాత అది చర్చ్ గా మారింది. ఆ చర్చి స్థానంలో రోమన్ టెంపుల్ కట్టారు. దాదాపు రెండు వేల సంవత్సరాల క్రితం కట్టిన ఆ భవన నిర్మాణం నమూనాగా చేసుకుని అమెరికన్ కాపిటల్, జఫర్సన్ మెమోరియల్, నేషనల్ గాలరీలను కట్టారు.

అక్కడ నుండి రూమ్ కి వెళ్ళి నిద్రపోయి సాయంత్రం అవుతుండగా కొలసియం (Colosseum) చూడడానికి బయలుదేరాం. యూరప్ రాకముందే ఏరీనా అండ్ అండర్ గ్రౌండ్ (Arena and Under Ground) టూర్ బుక్ చేసుకున్నాము. సాయంత్రం ఏడు గంటలకు టూర్, అక్కడికి వెళ్ళాక తెలిసింది. ముందు చెప్పిన సమయం కన్నా ఒక గంట ఆలస్యంగా టూర్ మొదలవుతుందని. అప్పటికి చీకటి పడిపోతుందని కాస్త నిరాశ పడ్డా చేసేదేమీ లేక దగ్గరలోనే ఉన్న ఇటాలియన్ రెస్టరెంట్ కి వెళ్ళాము.

 

డిన్నర్ అయ్యాక కేస్టల్ సాంట్ ఎంజీలో (Castel Sant Angelo) వరకూ నడుచుకుంటూ వెళ్ళి రోమన్ ఫోరమ్ మీదుగా కొలసియంకు వచ్చాము. అక్కడి నుండి సూర్యాస్తమయం చాలా అందంగా ఉంది.

"రోమ్ నగరం తగలబడుతుంటే నీరో చక్రవర్తి ఫిడేలు వాయిస్తున్నాడట". అమ్మ నోటి వెంట చాలా సార్లు విన్నానీ మాట. అప్పట్లో అర్థం కాలేదు, కానీ ఆ కొలాసియం చరిత్రకు కారణం అదే అని తెలిసినప్పుడు ఆశ్చర్యపోయాను.  

నీరో చక్రవర్తి పాలనలో విసిగి పోయిన ప్రజల అసంతృప్తిని పోగొట్టడానికి వేశపసియన్ (Vespasian) అనే రాజు, ఆంపిథియేటర్ (Amphitheatre) ను రోమ్ ప్రజలకు బహుమతిగా ఇవ్వాలనుకున్నాడు. అతని హయాంలో మొదలుపెట్టింది అతని కుమారుడు టైటాస్(Titus) రాజుగా ఉన్నప్పుడు పూర్తయ్యింది. ఆ ఆంపిథియేటర్ ప్రారంభోత్సవానికి అక్కడ వంద రోజులు పాటు ఆటలు ప్రదర్శనలు జరిగాయి.

మా టూర్ మొదలయ్యేసరికి పూర్తిగా చీకటి పడిపోయింది. కొలాసియం అండర్ గ్రౌండ్ లో లైట్ వెలుగు కూడా పల్చగానే ఉంది. రాత్రి పూట మాత్రమే కాదు అక్కడ పట్ట పగలు కూడా చీకటిగానే ఉంటుంది. కోలాసియం అండర్ గ్రౌండ్ లో పులులు, సింహాలు లాంటి క్రూర జంతువులను కూడా ఉంచేవారు. ఆ జంతువులను పైకి తీసుకుని వెళ్ళడానికి అప్పట్లో అంటే క్రీస్తు శకం ఎనభై మూడవ శతాబ్దంలో లిఫ్ట్ ఉండేది. ఆ లిఫ్ట్ పైకి వెళ్ళాలంటే బావిలో చేద లాగినట్లు మనుషులు తాడు లాగుతూ పైకి పంపించే వారు. అక్కడ జరిగే ఆటలలో దాదాపుగా నాలుగు లక్షల మంది మనుషులు, కోటికి పైగా జంతువుల ప్రాణాలు పోయాయి. మరో ఆశ్చర్యకరమైన విషయం ఏమిటంటే ఆ ఆటలలో పాల్గొనడం వారికి చాలా గర్వంగా ఉండేదట. కీర్తి కోసం ప్రాణాలు కూడా లెక్క చేసేవారు కాదు.

కొలసియం కట్టడాన్ని చూస్తే ఏదో అద్భుతాన్ని చూసినట్లు ఉంది కానీ, మేము నిలబడిన ప్రదేశంలో ఎంత రక్తపాతం జరిగి ఉంటుందో అనిపించినప్పుడు మాత్రం ఎక్కువ సేపు అక్కడ ఉండలేక పోయాము.

ఆ రాత్రి ఎక్కువ చలీ, వేడి కాకుండా వతావారణం బావుంది. ఆ పదిహేను రోజుల మా ప్రయాణాన్ని తలచుకుంటూ హోటల్ వైపు నడిచాము. వీడియోలలో చూసినప్పుడు అనిపించలేదు కానీ ఎదురుగా చూసినప్పుడు మాత్రం ఆ కొలసియం, పెంథియాన్, వాటికన్ సిటీ అన్నీ అద్బుతాలే.

ఆ తరువాత రోజు మా ప్రయాణం నేపల్స్ కు. అదే మా యూరప్ ప్రయాణానికి ఆఖరి రోజు కూడా.

ఆ కాబుర్లు చదవాలంటే ఇక్కడకు వెళ్ళండి.