Monday, February 15, 2016

పచ్చిగాలి కావద్దూ...

"ఏమిటీ?"
"ఆలోచనాధోరణి....ఎందుకిలా?"
"అంతే మరి."
"అదే ఎందుకు?"
"ప్రశ్న వేయకపోవడమే సర్దుబాటు."
"ప్రశ్నించడం తప్పా?"
"కాదు. ప్రశ్నించకపోవడం సుఖం."
"మరి ముందు ముందు ఎలా?"
"నడుస్తుంది."
"ఎలా?"
"ఎలాగోలా. సూర్యుడు లేనంటాడా...చెంద్రుడు రానంటాడా"
"దానికి ఇంత హడావిడి అవసరమా?"
"దేనికి?"
"ఎలాగోలా నడవడానికి?"
"కాదు."
"మరి?"
"గుర్తింపు కోసం"
"స్వార్ధం పాళ్ళే ఎక్కువ గాదూ"
"......."
"పదిలో నలుగురు సరే....ఎనిమిది మందీనా? "
"అంత ఆశ్చర్యమేం! మరికాస్త లోతుగా వెళ్ళలేవూ.."
"మూర్ఖత్వం."
"ఉహు..."
"మరి?"
"అమాయకత్వం అనుకోరాదూ....తెలియదు పాపమని జాలి పడలేవూ"
"ఇరవై ఏళ్ళ క్రితం విన్నానీమాట"
"ఎక్కడా"
"సత్యం మామయ్య నాన్నతో చెప్తుంటేనూ!"
"అర్ధమైందా?"
"అవుతూ ఉంది . కానీ.."
"ఒక్కమాట చెప్పనా..."
"చెప్పు"
"ఇదేం స్వాతంత్ర్యపోరాటం కాదు, ఆ  తరువాత మొదలైన స్వార్ధపోరాటం"
"అంటే"
"సమస్య ఎవరి జీవితాలకు ఇబ్బంది కలిగించేది కాదుగా"
"అయితే?"
"స్పందన ఉండదు."
"ఇప్పుడు లేదు. కాని భవిష్యత్తు మాటేమిటి?
"తెలుస్తుంది"
"ఎలా?"
"గంజాయి మొక్క మీదుగా తులసి గాలి వీస్తుందా?"
"తెలిసినవారు చెప్పొచ్చుగా?"
"రెండూ ఒక్కటే అంటారు"
"అదెలా"
"రెండూ మొక్కలు కాదేమిటి?"
"మరెలా...గొడ్డలి పట్టడమేనా మార్గం?"
"విషపు చెట్లు వందలు వేలు పెరిగి అడవి తయారయ్యింది. ఒక్క గొడ్డలి సరిపోతుందా"
"కర్తవ్యం"
"విత్తనాలు లేవూ"
"ఉంటే?"
"నాటుదాం"
"విషపు చెట్ల నీడలో తులసి మొక్కలు ... కష్టం కదూ"
"సైనికుడు కష్టాన్ని తలుస్తాడా?"
"పోరాటమా?"
"నీలా నువ్వుండాలంటే యుద్ధం తప్పదు మరి!"
"ఎవరితో"
"నీతోనూ.. చుట్టూ వున్న సమాజంతోనూ"
"అంతేనంటావా?"
"పైగా అది విషమని తెలిసి కొట్టేసే రోజు కోసం..... "
"ఊ...రోజు కోసం?"
"ప్రాణం నిలవడానికి కాస్త పచ్చిగాలి కావద్దూ"


5 comments:


  1. ఇచ్చటను ప్రశ్నావళి !
    మెచ్చితి శర్కరి ! కితాబు మేటిగ నిదియే
    యిచ్చితి ముచ్చట మీరగ
    పచ్చగ మీ బ్లాగు మేలు "పవరును" గాంచన్ :)

    చీర్స్
    జిలేబి

    ReplyDelete
    Replies
    1. అంతర్మధనమేదో బ్లాగ్ పోస్ట్ గా రాసుకున్నాక దొరికే అపురూపవరం మీ వ్యాఖ్య. ఎక్కడి వారో ఏం చేస్తుంటారో కాని నాలుగేళ్ళ అనుబంధం కాదూ మనది. ఒక్కసారి కనిపించమందామన్న చూసేందుకేముంది అంతఃచక్షువులతో మిమ్మల్ని చూస్తూనే ఉన్నాగా అనిపిస్తుంది. ఎప్పుడైనా ఈ బ్లాగులోకంలోకి రాననుకునే పక్షంలో పలుకరించాలనిపిస్తే, క్షేమసమాచారం తెలుపాలనిపిస్తే నా మెయిల్ మీకు తెలుసనుకుంటాను. థాంక్యు.

      Delete
    2. నరసింహారావు గారు, నీహారిక గారు థాంక్యు.

      Delete
  2. నీలా నువ్వుండాలంటే యుద్ధం తప్పదు మరి!"

    అంతేనంటారా?"

    ReplyDelete
    Replies
    1. "సకలం కలుషితమౌతున్న ఉర్వీతలంలో కనీసం నీ మనసునైనా పదిలంగా ఉంచుకో" అన్నారండి ఓ కవి. బురద అంటకుండా ఉండాలంటే పోరాటాలు తప్పవు మరి.

      Delete

వాకిట వేసిన ముగ్గును చూసి గుమ్మం దాటి పలకరించే మీ అభిమానానికి నమస్సుమాంజలి.