Wednesday, April 25, 2012

ఎందరో మహానుభావులు

        మా ఊరిలో కొత్త పత్రిక ప్రచురణ గురించి చెప్పాను కదా.. మేము ప్రచురించిన రెండవ పత్రిక ఇది. తొలి పత్రిక పోయిన ఉగాదికి ప్రచురించాము. ఆ పత్రికావిష్కరణ శ్రీ పెమ్మరాజు వేణుగోపాలరావు గారి చేతుల మీదుగా జరిగింది. ఈ పత్రికలే కాక మరో నాలుగు వార్తాపత్రికలు కూడా చేశాము కాని, వాటిని ముద్రించలేదు.

       పత్రిక ప్రారంభించడం వెనుక కథ చెప్పాలి మీకు. పిల్లలకు తెలుగు నేర్పిస్తున్నాము కదా, వారికి ఏవిధంగా స్ఫూర్తి నివ్వాలి అని ఆలోచించాము. పిల్లలు పెద్దలను చూసి అనుకరణతో చాలా విషయాలు నేర్చుకుంటారు. మరి పిల్లలు చూస్తుండగా పెద్దలెప్పుడూ తెలుగు చదవడం, రాయడం జరగడం లేదు. 'ఏ విధంగా పెద్దవాళ్ళను తెలుగు చదవడానికి ప్రోత్సహిచాలా' అన్న ఆలోచనలో ఉండగనే మా ఊరిలో పిక్నిక్ జరిగింది. ఆ సమయంలో జరిగిన జనరల్ బాడీ మీటింగ్ లో యాదృచ్చికంగా పత్రిక గురించిన చర్చ వచ్చింది. మా తెలుగు అసోసియేషన్ వారు, ఎవరైనా పత్రిక నడపడానికి స్వచ్ఛందంగా ము౦దుకు వచ్చే పక్షంలో పత్రిక, లేక వార్తా పత్రిక మొదలుపెట్టాలనే ఆలోచనలో ఉన్నట్లు తెలిపారు. అప్పుడు ఈ పత్రిక చేయడానికి శ్రీవారు ముందుకు రావడం జరిగింది. మనం ఏదైనా తలచుకుంటే దైవ సహాయం ఎలా లభ్యమవుతుందో ఆ సంఘటన ద్వారా తెలిసింది. 

      ఒక  పత్రిక రూపుదిద్దుకోవాలంటే ఎన్నిన్ని అంశాలు౦టాయో అనుభవపూర్వకంగా అవగతమయ్యింది. ఏ కథలు కావాలి, ఎన్ని కవితలుండాలి, వ్యాసాలు, పిల్లల కోసం ప్రత్యేకమైన  కథ...ఈ విషయాలన్నీ సమగ్రంగా పరిశీలించి కావలసినవి మా ఊరి ప్రజలు రాసేలా ప్రోత్సహించాం. మొదట్లో ఒకరో ఇద్దరో రాసి పంపించారు. ఇప్పుడు మెల్లగా ఎక్కువమంది ఆసక్తి చూపిస్తున్నారు. వాటిని పత్రికలో ఏయే పేజీలలో వచ్చేలా చూడాలనేది రెండో అంశం అదే 'లేఅవుట్' అంటే డిజైన్. మిగిలినది అచ్చుతప్పులు, ఐదారు సార్లు సరిచూసినా కూడా మళ్ళీ మళ్ళీ కనిపించే
అచ్చుతప్పులు మా ఎడిటోరియల్ బోర్డ్ సమర్ధవంతంగా సరిదిద్దారు.

      మన సంస్కృతి, సాంప్రదాయాలకు సంబధించిన ఎన్నో వ్యాసాలు, కథలు, కవితలు, పిల్లల కోసం ప్రత్యేకమైన కథ, ఇలా ఎన్నో అంశాలు ఈ పత్రికలో చోటుచేసుకున్నాయి. ఈ పత్రిక ఇప్పుడు మా ఊరి తెలుగువారి ఇళ్ళల్లో కాఫీ టేబుల్ మీద ఉండడం, వారందరూ కూడా చదవడం జరుగుతోంది. వాహిని పత్రికను
 మీతో పంచుకోవాలని బ్లాగ్ లో పెడుతున్నాను. మీ సలహాలు, సూచనలు పత్రికాభివృద్ధికి ఎంతో ఉపయోగపడతాయి.

     ఒక పత్రిక వెనుక ఇంత కథ ఉందా అనిపించింది. ఏడాదికి రెండు, మూడు పత్రికలకే ఇంత పని ఉంటే స్వలాభాపేక్ష లేకుండా నెలకో పత్రిక వేస్తున్న సంపాదకుల గురించి ఎంత చెప్పినా తక్కువే. ముఖ్యంగా ఇతర దేశాలలోవు౦డి సాహిత్యసేవ చేస్తున్న పత్రికా సంపాదకులకూ, వారికి తమ సహకారాన్నందిస్తున్నకార్యకర్తలకూ హృదయపూర్వక ధన్యవాదాలు తెలియజేసుకుంటున్నాను. 



9 comments:

  1. వాహినికి అభినందనలు! మీ శ్రమకు చప్పట్లు! :)

    ReplyDelete
  2. విజయోస్తు!! వాహినికి శుభాకాంక్షలు. మీ అందరికి శుభాకాంక్షలు.

    ReplyDelete
  3. వాహిని లో మీ కవిత , కధ, వర్మ గారి కవిత, అన్ని చదివాను. బాగున్నాయి. Congratulations!

    ReplyDelete
  4. @ కొత్తావకాయ గారూ నా శ్రమ ఇక్కడ చాలా స్వల్పమండీ.. మీ చప్పట్లు సంపాదకులకు అందజేస్తాను. ధన్యవాదాలు.

    @ వనజగారూ ధన్యవాదాలు.

    @ అనికేత్ గారూ నా బ్లాగుకు స్వాగతమండీ.. మీ స్మైలీకి ధన్యవాదాలు.

    @ వెన్నెల గారూ... వాహిని చదివి మీ అభిప్రాయం చెప్పారు. చాలా సంతోషం. ధన్యవాదాలు.

    ReplyDelete
  5. అంత గొప్ప ఆలోచనతో మీరు (మీరంతా) కంకణం కట్టుకుని ఇంత చక్కని పత్రికని ముందుకి తీసుకురావటం వెనుక ఇంత కృషి ఉందనమాట! అభినందనలు!

    ReplyDelete
  6. అమ్మాయ్! బొబ్బట్లు, పరమాన్నం, పుళిహోర మరిన్ని పెట్టేసి ఒక్కసారి తినెయ్యమంటే ఎలా అమ్మా! కొద్దికొద్దిగా తింటా. సరేనా!! ఊ అనుమరీ!!!

    ReplyDelete
  7. బాగుంది మీ వాహిని పత్రిక .అమెరికా లో తెలుగు పత్రిక ఇన్ని పేజీలతో !చాలా కష్ట పడ్డారు.అన్ని పేజీలు  చూసాను. ప్రతి నెల న్యూస్ bulletins లా విడుదల చేస్తే బాగుంటుంది.

    ReplyDelete
  8. @ రసజ్ఞా పత్రిక చూసుకున్నాక వచ్చే ఆనందమే ఆ పని వెనుకనున్న కష్టాన్ని మరచిపోయేలా చేస్తోంది. ధన్యవాదాలు.

    @ బాబాయిగారూ ఊ అనేశానండీ..మా పత్రిక గురించిన మీ వ్యాఖ్య చాలా ఆనందాన్నిచ్చింది. ధన్యవాదాలు.

    @ రవిశేఖర్ గారూ..ఏడాదికి రెండు పత్రికలు ముద్రించి రెండు పత్రికలు ఎలెక్ట్రానిక్ కాపీలుగా చేద్దామని ఆలోచన. భవిష్యత్తులో ఎక్కువమంది ఆసక్తి చూపితే నెలకొకటి చెయ్యొచ్చు. ధన్యవాదాలు.

    ReplyDelete

వాకిట వేసిన ముగ్గును చూసి గుమ్మం దాటి పలకరించే మీ అభిమానానికి నమస్సుమాంజలి.