Wednesday, November 16, 2011

మరుగేలరా ఓ రాఘవా

నా నీకు,
          ఆకాశం నాలాగే వేచి చూస్తున్నట్టుంది. చందమామను నిన్ననగా పంపాను నిన్ను చూసిరమ్మని, ఇంకా రానేలేదు. నా ఆలోచనలకు అంతరాయం కలుగుతుందనేమో ప్రకృతి సైతం చిత్తరువై చూస్తో౦ది. నిజం, కొబ్బరాకులన్నీ ఏదో మౌనరాగం వింటున్నట్టు గంభీరంగా వున్నాయి. కదలని మబ్బులు నిశ్శబ్దగీత౦ పాడుతున్నాయి. జాజితీగ జాలిగా ఇటే చూస్తోంది. ఒంటరి నక్షత్రం మిణుకు మిణుకుమంటోంది.

          ఏవేవో ఊసులు చెపుతూ నన్నల్లుకుని ఎన్నో ఊహలు. చిరుగాలై నిన్ను చుట్టుముట్టాలని, విరిజల్లై అభిషేకించాలని, సాగారాన్నై నీ పాదాలు తాకాలని, తెలిమబ్బై నీకు గొడుగు పట్టాలని, కిన్నెరనై నీకు సప్తస్వరాలు వినిపించాలని, ఊర్వశినై స్వర్గాన్నే నీ దరికి తేవాలని, ఇలా ఎన్నెన్నో.... నీతో కలసి వెలుగునీడల కలయికను, వేకువలో తొలి ఉషస్సును పంచుకోవాలనుంది. ఈ శరత్కాలపు రేయి మధురమైన పాటలు మంద్రస్థాయిలో వింటూ వినీలాకాశపు పందిరి కి౦ద వెన్నెలస్నానాలు చేయాలనుంది. రాత్రి మనల్ని దాటి సాగిపోతూ ఉంటే, కదిలే కాలాన్ని చూస్తూ అలా ఆగిపోవాలనుంది!

         ఎలా దాటనీ రాత్రిని? నీ పదసవ్వడి వినని నాడు ఇంకే శబ్దమూ నన్ను చేరకున్నది. ఎద వాకిట యుగాలపాటు వేచియున్నాను నువ్వొచ్చే మధురక్షణాల కోసం... అలసటతో రెప్పవాల్చుతానేమో! నన్ను దాటి వెళ్ళిపోకు. ఈ చిత్ర పటానికి నీ స్పర్శతోనే జీవం.

నీ
నేను

10 comments:

  1. ఎంతో అద్భుతమయిన భావ వ్యక్తీకరణ! ఇంత బాగా వ్రాసినది చదివాక ఎవరు రాకుండా ఉంటారు చెప్పండి? తొలిసారి మిమ్మల్ని చూసింది మొదలు అనే పాట నాకు నచ్చిన ప్రేమలేఖ. తరువాత ఇదే!

    ReplyDelete
  2. జ్యోతిర్మయి గారూ.. చాలా చాలా బాగుంది. మాటల్లేవ్ అంతే:)

    ReplyDelete
  3. మాట ఇంత అద్భుతంగా వుంటుందా !!!!

    ReplyDelete
  4. @ రసజ్ఞా నా రాతలకు స్పూర్తిదాయకం నీ వ్యాఖ్యలు. లేఖ నచ్చినందుకు ధన్యవాదములు.

    @ అపర్ణ గారూ మౌనంలోనే చాలా చెప్పేశారు. ధన్యవాదములు.

    @ మధురవాణి గారూ ధన్యవాదములు.

    @ శర్మ గారూ పలికించిన వాడు రామభద్రుడు కదండీ మరి. ధన్యవాదములు.

    ReplyDelete
  5. అద్భుతంగా ఉంది. ఇది చూడండీ!!!http://vanajavanamali.blogspot.com/2010/12/kavitwa-vanamlo-vanaja.html

    ReplyDelete
  6. జ్యోతిర్మయి గారూ
    రామభద్రుడు కాదు రఘు రాముడు!

    ReplyDelete
  7. జ్యోతిగారూ,
    ఒక తుళ్ళింత, ఒక బాధ, చిన్నపాటి ఆందోళనా, మరికాస్త భయం ఇలా అన్నీ కలిస్తేనే ప్రేమ. ఇది నాది అనే గర్వం, స్వాతంత్ర్యం మొత్తమ్మీద మథుర కావ్యం. ఇవన్నీ పలికిస్తూ పిలిస్తే రాఘవుడు రానని అనగలడా?

    ReplyDelete
  8. ఈ చిత్ర పటానికి నీ స్పర్శతోనే జీవం... This sums up the post beautifully. Congratulations.

    ReplyDelete
  9. @ వనజగారూ ధన్యవాదములు.

    @ రసజ్ఞా పేరులో ఏముంది అన్నింటా ఆ రామచంద్రుడే కదా..

    @ అరుణ్ గారూ... లేదండీ అనలేడు. రాఘవుని నివాసమే సీత హృదయమట. ధన్యవాదములు.

    @ మూర్తి గారూ ధన్యవాదములు.

    ReplyDelete

వాకిట వేసిన ముగ్గును చూసి గుమ్మం దాటి పలకరించే మీ అభిమానానికి నమస్సుమాంజలి.