మొదటి నుండి నాకు హిస్టరీ పెద్ద మిస్టరీ లాగా ఉండేది. వియనా వెళ్ళాక ఆ అభిప్రాయం మారింది. అక్కడ ప్యాలస్, తోటలు, పాదాచారులకు మాత్రమే ప్రవేశం ఉన్న రోడ్లు, మార్కెట్ అన్నీ నచ్చేశాయి. హాల్ స్టాట్ కొలను చుట్టూ నా మనసు ఇంకా గిరికీలు కొడుతూనే ఉంది. సాల్జ్బర్గ్, నది ఒడ్డున చెప్పుకున్న కబుర్లు, శ్మశానాలు కూడా ఇంత అందంగా ఉంటాయా అని ఆశ్చర్య పోవడం ఇప్పటికీ తాజాగానే ఉన్నాయి.
సంధ్య వెలుగులో ప్రాగ్ అందాలు, వాల్టావా నదిలో కనిపిస్తున్న దీపాల వెలుగులు మరోసారి ప్రాగ్ కు రమ్మని గుర్తు చేస్తూ ఉంటాయి. మిలాన్ ని తలచుకున్నప్పుడు మాతృభాషలో చదివితే కాలేజ్ ఫీజ్ కట్టనక్కర్లేదనే ప్రాగ్ విద్యార్ధుల మాటలు గుర్తొస్తాయి.
ఒక నగరాన్ని మొత్త౦ నీళ్ళ మీద ఎలా కట్టారన్న ఆసక్తితో వెనిస్ ను చూడాలని వెళ్ళాం కానీ, వెళ్ళాక అది మనస్సుని అయస్కాంతంలా లాగేసింది. తప్పకుండా మరోసారి వెళ్ళాల్సిన ఊరు. వేపారెట్టొ లో వెనిస్ అంతా మరోసారి తిరగాలి. ఇక మురానో, బూరానో, లో అయితే ఒక రోజంతా తప్పకుండా గడపాలి.
మెడీస్సీస్, రెనసాన్స్ లో వారి పాత్ర గురించి తెలుసుకున్నది ఫ్లోరెన్స్ వెళ్ళాకనే. ఫెర్రీ లో చిన్క్వె టెర్రె కి వెళ్ళడం, వెర్నజ్జాలో దిగగానే వినిపించిన ఆ చర్చ్ గంటలు చక్కని అనుభవాలు. రిటైర్ మెంట్ తరువాత మేము గడపాలని అనుకున్న జీవితానికి సరైన స్థలం లుకా లాగా ఉండాలని అనిపించింది. ఫ్లోరెన్స్లోని ఊఫ్ఫుజ్జీ గాలరీ, మైకలాంజీలో డేవిడ్ మరో రెండు అద్భుతాలు.
రోమ్ నగరంలో ఏ రోడ్డు మీద పూర్తిగా ఎండ పడడం లేదు. ఎందుకంటే రోడ్డు పక్కన బిల్డింగ్స్ అంత ఎత్తులో ఉన్నాయి మరి. ఆ రోడ్లు పట్టుకుని ఊరికే అలా తిరగడం బావుంది. రోమ్ - 2 లోని ఫౌంటైన్స్, గార్డెన్స్ ఎంతో నచ్చేశాయి. ఇక రోమన్ ఫోరమ్, కొలసియం, పెంథియాన్, ఇవన్నీ తీరిగ్గా చూడాలంటే ఒక వారం రోజులు రోమ్ లో ఉండవలసిందే. వాటికన్ సిటీ లో ఆర్ట్ వర్క్, సెయింట్ పీటర్స్ బసిల్లికాని చూస్తూ కాలాన్ని మరచిపోయాము.
పంపే వెళ్ళే వరకు శిధిలాలో చూడడానికి ఏమి ఉంటుందిలే అనుకున్నాము కానీ అక్కడకు వెళ్ళాక తెలిసింది అవి ఇటలీ నాగరికతకు ప్రతిబింబాలని.
అవి మా ప్రయాణం కబుర్లు. మేము యూరప్ కు వెళ్ళింది 2023 జూన్ లో కానీ ఈ ట్రావెలాగ్ పూర్తి కావడానికి మాత్రం రెండు సంవత్సరాలు పట్టింది. ఈ లోగా పాఠశాల మరో రెండు వార్షికోత్సవాలు జరుపుకుంది, మా ఇంటికి మరో చిన్ని తల్లి వచ్చింది. ఇంతకాలనికైనా పూర్తి చేయగలిగానని సంతోషంగా ఉంది. నాతో ప్రయాణించిన మీకందరికీ కృతజ్ఞతలు.
